Jooresbricht 2017

 Gschätzti Wurzegraberheere,

 y wurd euch jetzt no gärn beehre,

mit Sache, won y zämmedicht,

bi uns do haisst das Jooresbricht.

Me spüürt, do uff dr Wält wird s äng

und d Lütt verfange sich in Zwäng.

Dr IS duet sich mit Terror brüschte

und scho goots los, das grossi Rüschte.

Au Toleranz liggt drum nümm dinn,

dr Extremismus isch hütt in.

s wird politisch gly so kritisch,

ass für e Grundsatzwäägseläggsel Zyt isch,

suscht mache denn die Primitive,

nur no Volksinititative,

dört merggsch bim Titel scho, s wird glooge,

es haige sich scho d Balke booge,

Wenn glooge wird, gilts do z bemergge,

sottsch politisch d Mitti stergge,

denn wirdsch verwütscht, no git s e Geschrey,

zerscht urteilt d BaZ, denn d Schuggerey,

doch s Gricht sait, s syg kai Luug gmäss Akte,

hüt haissts alternativi Fakte.

D Hillary sait echauffiert,

dr Wahlkampf syg globalisiert.

Am Delifon het si, s haig gstöört,

statt Summton russischs Rusche ghöört

und sythär isch jetzt d Hillary,

tendenziell die Stilleri,

drumm het me prompt dr ander gwählt, 

wo sich wie unsre Gilbert strählt, 

glaubt nit an Gott und global warming,

derfür gseet är sich als prince charming,

knapp sibzyg, digg, ka kaini Sprooche, 

drumm  renne ihm au d Pussys nooche,

zem sichergoo, ass d Wirtschaft lauft,

wird kräftig Munition verkauft,

drby möcht är mit syne Waffe,

doch uff dr Wält nur Friide schaffe,

e so in Widersprüch verstriggt,

suecht är im Ussland drumm Konflikt.

Kuum im Amt, het är nach Stunde,

z Korea scho si Pendant gfunde,

uff Asie schiggt dä Schürzejäger,

will är s ka, zwai Flugzüügträger,

und scho stoot jede Ami stramm,

vo New York bis zem Hoover-Damm

und är blyybbt bis zem bittren End,

e so dr Mister President.

Au d Schwoobe glänze s letscht Joor nit, 

bi aim schmeggts bsunders fescht im Schritt,

dr Jogi Löw haig schyyns entdeggt,

wie s in Schwoobehoose schmeggt.

Schmeggts bim Franzos so gruusig jääs,

denn saisch däm Le Päin in the äss.

In Bärn waiss schyyns dr Blick genau, 

wär Vater wird, no vor dr Frau,

wo ghörnt wird, jä so syg das gscheh, 

vom Sünder Christophe Darbellay.

är dänggt bim Akt zue jedem Keuch,

so geht hin und vermehret euch.

Vermehrt hän sich, bim Tescht vo Stress,

au unsri EM-Nati-Dress.

Wenn aine rupft, wie isch das gail, 

fliegt das Dress, in siibe Dail.

Ähnlig gail, nur ohni Trikot,

verliebt sich aini in dä Kiko,

als Wärtere dört vo sym Gfängnis,

isch si scho gly in Gfühlsbedrängnis,

will me duur d Stääb halt schlächt ka schmuuse,

holt s en uss dr Kischte uuse.

Denn hänn sy kurz z Italie gwohnt,

nur s Züügle haig sich nit ganz glohnt,

obwohl är dänggt het, y verduft,

schnuuft är scho wider gsiibti Luft,

und vermisst e Bitz sy Alti,

dr neuy Wärter haisst drumm Walti.

Apropos Kischte, mit vyyl Gschrey,

haisst s gröschte Gfängnis hüt Türkei.

S dunggt aim fascht, s syg inszeniert,

damit das, wo passiert, passiert,

denn syt dä Putsch in d Hoosen isch,

zaigt är, ass är e Grosse n isch,

und schaltet sythär in däm Ryych,

politisch alli Türke glyych,

sythär sinn sich jetzt d Türke ainig,

s git kai Türk me mit andrer Mainig,

drum haisst uff türkisch Erdogan,

rächt ussgsproche Erdowahn.

S git ebbis wytters glatts in Basel

Es schryybt die BaZ jetz nümm nur Gfaasel,

Die fyyni Klinge isch verbyy, 

mit Gift und Galle schiesst me dryy.

Dr Baschi Dürr het nit verdrait,

ass me däm Vorgang bashing sait.

E Rundumschlag,  tuet sich drumm loone,

nid wäge türkische Spione,

en andre isch au zwangsverraist,

damit s statt bashing lipsing haisst.

Mit andere isch d BaZ vyyl zahmer,

y dängg do an e Connie Cramer

und Lütt, wo d Zyttig schaissegal isch,

wenn s nit zwai Wuche vor dr Wahl isch,

wo im Amt ans Elsass dängge,

und gärn Glais und Gäld verschängge,

und kunnt s nach zwai Joor uss denn ändlig,

sait är zer  Kritik unverständlig,

me könn jo jetzt bi Velos spaare,

wo nit düür im Krais mien faahre.

D Stimmig styggt und s Volk, das johlt,

dr FCB het s Double gholt,

Wäg aim isch d Freud grad bsunders gross,

denn s Wallis isch sy Mythos los,

Nach dryzäh Mool in Folg s tönt gspunne, 

hänn au Mol die andere gwunne,

Und s Publikum, so het s gly döönt,

syg z Basel jetzt erscht rächt verwöhnt.

Ass anderscht wird, jä nundefaane,

muess e neue Sportchef aane,

e Club uss luter Basler weller,

sait dr Aescher Marco Streller,

e Trainer, wo s nit bringt, dä schigg y,

usser s wär my Fründ, dr Wicky,

doch s Volk, waiss me, das gseht gly root,

wenn s um Brot und Spiele goot,

und wenn s em Volk denn wirklig längt, 

wird immer zerscht dr König ghänggt. 

Drum het doch d Zuekunft au sy Raiz,

die nach dr Aera Heusler / Heitz.

Wo gwunne hänn, was‚ z gwinne git,

drum nämme si e Bonus mit,

Nach acht mol Maischter, zwaitem Stärn,

verkauft me d Aktie bsunders gärn,

me goot denn, wenn s am schönschte isch,

s gilt au für uns am Vorstandstisch,

es sott em Vorstand nämmlig glinge,

sich stetig tranchewyys z verjünge,

denn miehsam isch s, me muess sich quäle, 

wotsch e ganze Vorschtand wähle.

Y ha mir das fescht z Härze gno,

und mach das doch nid e so,

drumm sait do nur dr Davide,

em Vorstand hüt uff Widerseh.

Är goot im Guete, s isch z betone,

und duet au künftig z Basel woone,

nur will är halt, will s halt so isch,

wider zrugg an aigne Tisch.

Zem Abschied aber wänn mir jetze,

in Form vo Bier e benchmark setze,

dr Kassier het dangg uns scho gschtrahlt, 

denn d Schwemmy isch für näggscht Joor zahlt!

Dr Seibi ka me numme loobe,

für e Wahnsinns-Heerenoobe,

dä Oobe, dä het nur ai fauxpas,

tuschlet me in halb Europa,

är stoot im Zaiche vo dr Frau,

s isch nid per se e Supergau,

au wenn d dy frogsch, wo das no ändet,

e  Dällerspänd für Fraue gspändet,

kuum gspändet hoggt, so ghört sich das,

e Frau halb blutt im Whiskyglas,

am plansche drinn wiene sexy Koi,

und haisse duet si Scarlett Zoe,

au d Uffnahm isch all Joor dr Hit,

und sänggt bi uns dr Altersschnitt,

in siebe Joor, han ich vernoo,

hänn mir knapp achtzig Lüt uffgno,

und s Kämmerli, das isch zur Stund,

vom Bestand här dorum gsund,

trotzdäm simmer, s macht aim ranzig,

nur vierhundertainezwanzig,

doch d Moody Tunes, die spiele uff,

im Saal hän erschti scho ne Suff,

vo Merlots und vo Primitivas

drümmlig wird s aim wäg de Divas,

dr Präsi reedet, dr Stargascht au,

wie immer kümmeret das …. uns au,

Denn isch s sowytt, dr Oobe umme,

no isch me no im Bier in gschwumme.

Me het mit Fründe diskutiert, 

me het sich gsellig amüsiert,

damit sich dank uns Wurzler Gilde,

Fründschafte in Basel bilde,

denn d Fründschaft unter Männer, Nätte,

kunnt nit z stand bim Online Chatte,

sondern wenn me zämme singt, 

zämme schwätzt und Zytt verbringt,

jä d Fründschaft unter Sängerknabe,

goot maischtens zue de Wurzle aabe,

wo sich bim Wyy au s Gmiet uffhellt,

und d Ehr vom Ma no öbbis zellt,

dä Ort do ohni wenn und aber,

isch s Kämmerli vo Wurzegraber,

drum stooss y do vo Maa zue Maa,

 zem Schluss mit euch uff d Fründsachaft aa!

 
Jooresbricht 2016
Wäärti Wurzegraber-GV, Wie all Joor redet jetzt dr StV,

Und verzellt euch do e Gschicht, Me sait däm Schauspiel Jooresbricht.

Im letschte Joor isch vyyl passiert, me het sich drum au enerviert,

In Basel-Wescht, es isch nit glooge, wimmlets neu vo Scientologe,

wo in dr Stadt dien Lütt aahaue, und haimlig dien e Zentrum baue.

Zerscht griege sy dr Stämpel nit, damit s kai neue Tämpel git,

doch kurzdruffaabe schtoot dä Laade samt em Krüz an dr Fassaade.

Apropos Sekte, no vyyl glatter, isch d FIFA Sekte vom Sepp Blatter,

Am Morge frieh, im Boor o Lac, do pagge sy das Lumpepack,

und s goot de Bonze denn an Graage, und das erscht no uff lääre Maage.

Dr Luxus dangg Bestächigsgäld, isch Standard in dr FIFA Wält,

Me het hütt aller Annahm aa, s Konto schyyns in Panama,

so sygs dört im e Paper gschtande, wäg däm isch z Züri nüt vorhande,

Im FIFA Huus am Züribärg, regiert är nümm, dä Glatzezwärg,

Dä armi Maa, dä miess me schone,  är het nur sich… und d Millione,

drum will däm alte Silberrugge, e Franzoos jetzt no ains yynedrugge,

Die strytte sich ganz sonderbar, fascht wie e älters Ehepaar,

doch statt Blatter und Platino, gwünnt am Schluss dr Infantino,

wo sich druff aabe zaigt, s dönt hart, ass är halt au gärn offshore-spart.

Im Baudep mergg es d Lüt scho gly, Bewilligung isch Je-kha-mi,

Jede griegt se, het das zaigt,  wo dr Hampe Wessels laikt.

S Versaage, wo ys irritiert,wird gly druff aabe kompensiert,

pro Basler baut dä Stadtbildschänder gfüülti hundert Veloständer.

Uss wysser wird bald jedi Nacht, mit Farb e blaui Zoone gmacht, 

und uss Parggblätz wird vom Eglisee, bis Wettstaiplatz  e Prachtsallee.

Das stimmt nit, het dr Wessels gfunde, ain gits no, in der Dalbe n unde,

sythär waiss me jetzt, oh herrjee, Baudepp schrybbt me mit zwai P.

Aimol mee, wird d Stadt versaut, wenns AUE dä Protzbau baut,

s Wichtigst wär, das plant me kuum, e riisegrosse Pauseruum,

gääg uuse duet me wäffele, und sunscht dr ganz Daag käffele,

 mer mainte ass’ gly obsolet isch, dä Gummiholzbau minergetisch,

denn s maant das Huus uss Gummeli, an d Rahmestigg vom Drummeli,

 denn wie dört, s isch nit ganz bache, zahlt au s Volk, und het nüt z lache.

E wytteri Waal gseht me nit gärn, D Sibel Arslan z Bundesbärn,

Die Wahl macht si trotz grossem Gschrey, stroofimmun und schuldefrey,

denn kuum isch si vo do verschwunde, het sy dr Faade schyyns nümm gfunde,

am Rednerpult, do wirggt sy doof, wie aini im Secondo-Schloof,

em Rutschmaa wurd das nie passiere, wenn är ains ka, ischs profiliere,

duet neume s Telebasel draie,  stoot är scho in dr erschte Raihe.

In Basel gseht me wyssi Spinner, ganz in wyss, am wysse Dinner,

dört isch, wie könnts au anders sy, dä Rutschmaa sicher au derby,

Apropos Schwyzer Volkspartey, die blocheret jetzt blocherfrey

denn s erscht Mol, s Volk isch schwer entsetzt, het sich d SVP nit duuregsetzt,

wenn s um fremdi Fötzel goot, drum maint dr Vorstand jetzt, är goot.

D Frau Leuthard duet au d Schwyz beschwööre, und waiblet mit dr zwaite Röhre,

Au z Therwil git s e Duurenand, dört git me Fraue nümme d Hand,

der Bappe schreyt, das syg e Sünd, das miech me nit us Glaubensgründ

und kurzdruffaabe, do uff Ärde, möcht dä Bartli Schwyzer wärde,

als Näggschts do stellt är, s isch e Fluech S Wurzegraberbytrittsgsuech,

nur griegti är, wie s halt so isch, zur Stroof sy Blatz am Ruesserdisch.

Au z Köln dien sich vyyl Fremdi tummle und dütschi Maitli grob befummle,

gross isch drum s empörte Gschrey, drum schiggt me si jetzt in d Türkey,

d Frau Merkel zaalt s, me gseht s re aa,sie glyycht scho eme Böhmermaa.

Wäg Global Warming wird s schyyns wärmer, nur z Züri wird me gaischtig ärmer,

die hän vo däm nüt mitbekoo, dä Böög brennt woorschyyns immer no,

dr FCB isch s sibt Mol Maischter, bim Logo schaide sich drumm d Gaischter,

d Fans und Schugger sin am schleegle, wie will me s grafisch künftig regle,

wo kunnt denn do, jä nundefaane, dä zwaiti Stärn im Logo aane?

 
GV 30.5.2017, 19.00 Uhr

Liebe Wurzengraber

wir treffen uns zur GV am 30.5.2017, um 19.00 Uhr im Restaurant Rebhaus

 
Terminverschiebung GV 24.5.16
 
Sali zämme, wägem letschte FCB Match und dr Pokalübergoob setze mir d GV e Daag friener am Zyschdig 24.5.2016 aa. Wiederum alles uff die 7i.
 
GV am 24.5.2016, 7i im Räbhuus
 
Am Zyschdig 24. Mai 2016, 19.00 Uhr isch GV im erschte Stogg vom Räbhuus! S git wie immer s Neyscht vom Verein, e Jooresbricht, wo dichtet, Pizza und Getränk für alli. Me gseht sich dört...Yyladig folgt...
Heerenoobe 2017 isch am 7.1.2017 im Volggshuus...
 
Jahresbericht 2015
Währti Wurzegraber-GV, Wie all Joor redet jetzt dr StV, Und verzellt euch jetzt e Gschicht, I glaub, me sait däm Jooresbricht.
S letscht Joor in Värsform zämmezfasse. was isch passiert, wär kunnt an d Kasse, Isch schwierig gsi wäg Zytigsänte, Vyyl Unsinn und Fisimatänte,
Wo passiert sin, im letschte Joor, Villicht kunnt Euch das au so vor, Zem Byschpil muess es hüt so syy, Me rennt dr Technik hindedryy,
modärn isch, machsch am fünf vor elfi, Statt z schaffe scho di zwanzigschts Selfie,An Stange gseschs die i-phones blitze, ghebt vo Buschis wo no kuum könne sitze,
Z Bade haig schyyns in dr Nacht, Sogar e Pfyffe Selfie gmacht!
 
Dr Achter fahrt, denn Geiz ist geil, Syt däm Joor jetzt diräggt nach Weil. Si Usslaschtig isch am überschwappe, Dr Euro isch bi achtzig Rappe.
Und gly druff nur no am überborde, Dr Euro syg wider tüürer worde.Bim zruggkho druggsch di in e Lugge, S Tram isch voll mit volle Gugge.
Denn het me schyyns, s närvt d Gschäfter dopplet, Dr Frangge au no grad entkopplet,Und ass au wirklich jede goot, Gseht dr Grossi Root no rot,
Fiehrt s Gwärb denn volländs zum Schaffott, Und beschloot die Stadt mit Fahrverbot. Sythär isch s läär do, s isch e Schand, Wiene Bank in Griecheland.
Drbyy hän si vo unsre Stüüre, No d Schiine zahlt in Weil, die Düüre. Au d Flexi-Trämmli het me kauft, Drmit in Weil dr Marktkauf lauft.
Dr Gipfel isch, so vor de Wahle, Mer mien au no für d Ruckfahrt zahle. Dra merggsch ass monetär scho vieles stimmt, Wemme s Baselland zem Vorbild nimmt.
 
In de Zytte vo dr Heidi Abel, Und Delifon mit schwarze Kabel, Hets d Roche scho gäh und Büüch mit Nabel, Nur kain Turmbau do zue Ba…sel.
Dä Turm kriegt schyyns architektonisch, None Zwilling, was e Hohn isch , Denn dä Expat- Haasestall, Gsächtsch au ellai vo überall,
Au d Wasservögel hän wäg däm sym Schatte, Nur unter Wasser non e Latte, Nur d Frau Schwan waiss drum fruschtriert, Was ihre Maa do kompensiert…
 
Dr Wessels het, oje minee, Aimol mee, e Glanzidee, Zem Stadtbild ghöri schyyns au s schmecke, Drum will är d Abfallsegg verstecke,
Damit s au richtig düür duet wärde, Plant me s Ganze unter d Ärde, Obwohl d e Bebbisagg muesch kaufe, Darfsch zum entsorge au no laufe,
Für s glyyche Gäld, die hän e Maage, Muesch dr Sagg jetzt sälber traage, Und für die Mulde, s regt aim uff, Göön wider hundert Parkplätz druff,
Nur s Trudi ussem Lamm, die Glugge, Drait dr sagg nid uffem Rugge, S Baudepp het re, het si prahlt, E Hänggel an Rollator zahlt.
Si lüpft dr Sagg bimm Loch ellai, Trotz em Wasser in de Bai, Und kuum isch dr Sagg im Bode unde, Gilt au s Trudi als verschwunde.
Me brichtet vo Hundesverlochete in Australie, Und andere Je-ka-mi-Lappalie, Und s wichtigscht vergisst me, S macht aim schyyssig,
D Wurzegraber sin hundertdrissig!
Drum gits im Herbscht mit vyyl Gedrummel woorschyyns e Jubiläumsbummel.
 
Doch s wichtigscht sin nid d Staatsussgoobe, Sondern unsre Heerenoobe.
Und dä isch das joor bsunders toll, Im Volkshuus gsi scho s dritte Mol.
S Ässe guet, fascht wie dehoam, D Fläsche teilwyys Jeroboam,
Sympathisch redet zue uns Zwärge, Aine vo de Ängelbärge.
Dr Davis Tom duet bim konferiere, Sich uff dr Bühni inszeniere.
S goot, d Tällerspänd, de glaubsch es nid, an EHC, wo s gar nimm git.
 
Jahresbericht 2014

Währti Herre Wurzegraber
Jetz  kunnt em Vize sy Gelaber
Im Joor vo Bauschtelllärm und NSA
Vo Gripen und Massenyywanderigsgschrei
Für dick und dünn und Lyt mit Gicht
Kunnt an däre Stell dr Jooresbricht

Mir glatte Wurzgraberzwuggel
Hän mängges Joor scho uffem Buggel
Drum grabemer au wyter flyssig
Denn s näggscht Joor wärde s hundertdryssig!

Wie jedes Joor scho, het mi dunggt,
isch dr Heerenoobe dä Höhepunkt.
Nur das Joor gits en Ultimatum
Nie me friehner so vom Datum
wird dä Oobe organisiert
und künftig spööter duuregfiehrt.
Denn s het halt dr aint oder dr ander
E Neyjoorskaterduurenander.
Doch das Mol kha me do hüt z Oobe
Dr Heerenoobe wirklich lobe
Zum zwaite Mol im Volkhuus gsässe
S Programm voll gnosse, zämme gässe
Und das, gmäss Ruckmäldig sehr guet
Wie s sich bi uns das ghööre duet.
S het sich au bim Programm kain beschwärt
Im Gägedail s het sich bewährt
Ass ain vo extärn duet konferiere
Und uns duuren Oobe fiehre.

Rückblickend erschyynt aim gwüss im Traum
Näbscht Spatte, Biggel, Tannebaum
das nubisch- rote Glitzerkleid
und sorgt für Grinse männlig brait.
Oder au d Reed vom Urs oder vom Wherlock Richard
Won är für uns het aabezwitschret
Ass me als Maa au wyter Maa isch
Wenn d bim Ballett mol vornedraa bisch
Und d Bands, Artischte, sprich s Programm
Isch wunderbar gsi dört näbem Lamm
I sag dodrum im Name vo uns alle
Seibi, nomol so, s het uns gfalle.

Syt letscht Joor sin mir, dasch famos
jetzt ändlig unsri sächs Gyzling los
wo trotz Mahnig nid hän welle zahle
und am Heerenoobe trotzdäm strahle
Mer hän, wär vo sich nüt het hööre losse
Ussem Verain jetzt uusegschosse.

Uff unsrer homepage, s tönt makaber
Het glatts Züüg grad für Wurzegraber
Khasch das Formular do aabelaade
Und s het d Date druff, wie amne Fade
Drum mäldet Euch händer s Login vergässe
Bim Dysli oder Guuge nächhär bim ässe.
 
Eppis andres beschäftigt ys usser s lääse
Das nennt sich Mitgliederwäse
E Huffe vo uns sin letscht Joor gschtorbe
Und praktisch alli hän ums verworrge
Im Glaibasel gwohnt, so hinterlischtig
Und verfälsche jetzt d Vereinsstatistik
So simmer jetzt no 434 Nase,
vo däne no 3 Fünftel im Glaibasel grase
drum nämmed do die Zeedel mit
und gänds im Umfäld jedem hit
wo eurer Mainig no sott kho
und bi uns in d Raihe stoo
und s wär no guet ganz ohni Gfasel
käm är no ussem glaine Basel
uff dass unsre Baum uffs Neu kha spriesse
und s au no unsri Änkel gniesse.

Fascht nüt gsait und scho am Änd
E Gruess, dr Vizepräsidänt.

 
Jahresbericht 2013

So immer gäge Ändi Mai
Nach Bluemeschtruus und Oschterai
Dien d Wurzegraber flissig rammle
Oder sich zer GV sammle
Wär hät bi dr Gründig dänggt, ob är im Stand syg
Wird dä Verain 128?
Mir wüsse jetz insgehaim
Mer sin halt scho e Gwaltsverain!
Ain mitme tolle Heerenoobe
Wo jung und alt duet ummetoobe
Und d Yysicht isch jetzt au so wyyt
Im Unterschied zu Zünft göön mir mit dr Zyt
Statt Martin Luther, Gaukler, Händler
Moderiere bi uns Sutter Schreegstrich Pfändler
S Ässe isch e Bombe gsi
Nur ain het gfluecht, es macht en hi
Im Vrglyych zue sym Menu sigs dört e Hohn
I maint är het nannuelli Deformation
Dä Aaloss in däm neue Saal
Isch alles anderi als e Qual
Dr Wyy het gmundet, d Lüt hän gstrahlt,
s Bier wird sogar vo dr Regierig zahlt.
Dä Verain isch dekadänt, scho fascht pervärs
Sogar dr Jooresbricht syg do in Värs.
Nur das Gwaltsprogramm und s feyne Schmatze
Koschtet halt e rächte Batze.
Ass d Qualideet au künftig stimmt
Und jede die Stimmig haimenimmt
Miemer punggto Köschte woorschyyns handle
Und diens unter Punkt 8 hüt no behandle.
Ai Grücht het sich ghalte aigewillig
Dr Volkshuus-Saal syg gratis oder billig
Dr Kassier sait: Das stimmt so nid!
Är isch glyych düür, wie alles wo’s sunnsch so git.
Nur dr Muba ligts für uns nümm dinne,
die wurde punggto Bryyse spinne!

445 Mitglieder simmer
Aso öbbe glyych viel wie immer
Au d Quote vo Glaibasler zaigt nach oobe
Si haig sich um 0,03 Prozänt verschoobe
Für d zwai Drittel Mehrhait isches gly sowyt
Nur hämmer do no drei Joor Zyt.

Syt letscht Joor sin mir im Internet
Mit ere homepage, wemme däm so saage wett
Und s luschtigschte isch schyyns do dra
Isch ass kain ohni Login richtig yyne kha
Nur wie Wurzegraber halt so sin
Mache Passwörter für Sie halt nid vyyl Sinn
Drum mäldet euch bim Christian Dysli
är sait euch s Passwort und das lyysli
denn khame sich au mit krummem Rigge
d Mitgliederlischte sälber drugge
E wytre Punggt für uns isch d GV
Ihr gsehnt, zwai Drittel luege lieber TV
Doch Wurzegraber mit Härz und Seel sin do
Und wärde au in Zuekunft kho
Die wüsse ohni wenn und aber
Me isch au ohni Schlips e Wurzegraber
Drum kha s nid syy, und e het e Noochgschmack, e Schaale
Ass me bi dr Erfüllig vo de Verainspflicht au no muess zahle
Drum wird ab sofort dodrbyy
S Ässe und trinke an dr GV gratis syy.
Doch bevors jetzt ain duet duurezwänge:
Für Sassicaia muesch immer no hinterelänge.
Doch für Wurscht und Brot und anderi Spässli
Gits vom Verain drei Gratisfässli.

In däm Sinn stooht mir nur no ains bevor
I wünsch Euch e wyters tolls Wurzegraberjoor
Und dänket dra, am 4. Jänner
Isch wider Oobe vo de Männer
Wo mir mitenand alli zämme
Im grosse Stil ain zämme nämme
Mit däre Info bin ich jetzt am Änd


Eure Vizepräsidänt